POLÍTICA MUNICIPAL

• É unha ocasión de máxima importancia para os/as xóvenes galegos/as en particular, e para o conxunto da sociedade galega en xeral, que X.S.G. plasmen nun documento político as súas inquedanzas, obxectivos e, por suposto, os medios necesarios para acadalos, nun ámbito tan importante como a política municipal.
• Os/as xóvenes socialistas pensamos que é a partires do concello como mellor se pode plasma-lo principio xeral de servicio ó interese xeral da cidadanía, pois trátase da administración máis próxima ó cidadán. Tras máis de dez anos de experiencia e funcionamento da Lei de Bases de Réxime Local, é preciso aborda-la súa reforma, tanto para mellora-la capacidade operativa dos municipios, como para establecer novos mecanismos de control sobor dos mesmos e das súas actividades (como a contratación de persoal), tendentes a garanti-lo axeitado cumprimento da lei.
• Estes dez anos puxeron de manifesto importantes diferencias xurídicas no control da xestión municipal. Os concellos realizaron particulares e interesadas interpretacións do texto legal, debido, en grande medida, á falta de precisión no seu articulado, o que, unido á inoperancia contrastada do recurso contencioso-administrativo, chegou a converter á meirande parte destas institucións en núcleos pechados de imposible acceso, semellantes a "coutos privados" dos caciques de turno.
• En base a isto, é necesario plantexa-la creación dun novo estamento supramunicipal, que entenda e resolva de xeito rápido e eficaz sobor dos conflictos derivados do desenrolo da xestión e actuación municipais.
• Os xóvenes socialistas debemos reprantexa-lo papel das Deputacións dentro do marco legal da Lei de Bases de Réxime Local, debido á duplicidade de competencias e á absoluta falta de transparencia no desenrolo da súa actividade, sendo na práctica uns meros repartidores de prebendas e favores entre os seus acólitos e "señores territoriais".
• Por iso propoñemos a total reconversión no prazo máximo de dez anos, pasando gradualmente as súas competencias ós municipios, ás comarcas, ás mancomunidades e ás novas estructuras de agrupacións municipais. É preciso chegar no tempo máis curto posible ó reparto do 50-25-25 % (corresponsabilidade fiscal) para atalla-la difícil situación financieira dos concellos, provocada ó teren estos asumidas competencias propias e doutras administracións sen o necesario apoio económico, sendo obvia a necesaria clarificación competencial estatal, autonómica e municipal.
• Asimesmo, coidamos de urxente necesidade en tódolos concellos a creación dunha figura política que integre as necesidades veciñais coas posibilidades reais do concello, obrigando a reunións periódicas nas que os seus acordos teñan carácter vinculante para a inclusión nos distintos presupostos de obras e servicios daqueles que os cidadáns consideren máis importantes.
• No eido estrictamente xuvenil, constatamos que as competencias locais en materia de xuventude son escasas e pouco clarificadoras, e, polo tanto, propoñemos que as distintas corporacións en condicións legais e financieiras adquiran o compromiso claro de levar a cabo as seguintes competencias:
• - xestión de tódolos equipamentos adicados á xuventude
• - albergues e campamentos
• - Casas da Xuventude
• - centros de información xuvenil
• - centros de programación cultural
• - programas de asociacionismo xuvenil
• - programas específicos de emprego
• - cursos de formación ocupacional directamente relacionados coas condicións socioeconómicas do medio no que se desenvolven.
• Por todo o exposto, X.S.G. esixe que, dende un proxecto progresista, non se esqueza un novo impulso municipalista, tremendamente necesario para afrontar un horizonte histórico, tanto para o noso país galego como para o resto de Europa, no que o papel dos municipios deberá ser protagonista e peza esencial na profundización e creación de espacios con alta calidade de vida, competitivos económica e socialmente, capaces de aliarse cos seus veciños, seguros, limpos, ordenados e dotados de proxectos ambiciosos na procura de obxectivos tan importantes como a igualdade, a liberdade e a xustiza social.
• Non debemos esquece-lo noso pasado emigratorio, polo que temos a obriga de loitar nos nosos concellos por acoller sen ningún tipo de discriminación ós novos cidadáns.