DANDANIW
Ni Bonie Cayetano
Insan
Aloha!
Impasabatda a kablaaw kenka
Lua, arakup, impaayda
Anian a ragsak inka narikna
Ta nabaddekamon Hawaii a daga.
Insan,
tattan ta adayoka
Tattao ditoy inda metten naikawa
Iti laingmo a kumata ken kumutibeng ti gitara
Nangnangruna dagitay adda tianggina
Ta awankan a pautanganda.
Pato,
Ganso, Manok, itan agkaiwara
Ta awan kan a nalaing nga agtukma
Uray pattong surotem latta ida
Ayatmo laeng a makaramanta
Ti naimas a pulotan no uminomta.
Lagipemman
dagidi aldaw a panagkaduata
Manipud Luna, Baguio, ingganat' Manila
Adu a rigat, ragsak a linak-amta
Ngem awan man la a pulos naad-adalta
Gapu ti arak, sugal, ken barkada.
Sipud
metten idi addakan dita
Ni insan mo napan metten nangrikna
Nagkalkallautang a nagsapsapul ti pagobraanna
Ket iti siudad ti Baguio nakaisadsadanna
Para sibog mula, ken prutprutas a nadumaduma.
Masuronka
siguron a mangbasbasa
Toy pluma ni insan mo a napnuan iliwna
Ngem uray no kasta, sagutko iyur-urayko latta
Ta ammok met ti abilidadmo a parsua
Manangisagut, managparabor, amin nga ugali adda kenka.
Toy
suratko ammok nga addanto met subadna
Ta ammom met siguron ti pakaitarusanna
Dagitoy a balbalikas a naikur-itko kenka
Ta no Bannawag koma ti nakaipatulodanna
Siguro
dakkel ti bayadna.
Iliw a nagpaiduma
luluak di metten
agpatingga
ta toy pusok, sika la't ipitpitikna
apay ngata a kastoy metten ti banagna
ti iliwko a napalalo kenka.
Tunggal
mangngegko't kutibeng ti gitara
Kunkunak: Ni insanko, adda man la koma
Ania aya a talugading ti adda kenka
Ta apay a kanayon a malaglagipka
Siguro toy insan
mo malaglagipmo met ngata
Ngem uray no kasano't iliw, lugar aginnaddayota
Ikarkararag ta ketdi iti Apo a namarsua
Ta toy insanmo makaumay to met dita
No ammok la koma
ti desdes a kumamang dita denna
Pagnaek koman uray sakakon ti agkadapa
Ngem damagko a di kano met mapagna
Ta dakkel kano a billo-billo ti mangitulod kenka.
Inton
bumakasyonka, pakaamoannak to koma
Ta sabtenkanto iti Erport idiay Manila
Ta Riknaekto man met no kasano't ganasna
Ti sumabat iti Hawayano a kas kenka.
Daniw,
kanta, innak idan isagsagana
Agpaay kenka, insanko a nagpaiduma
Nabara nga abrasa iyarakupkon to kenka
Tapnon iliwko, maipapaskonto ida.
Uray daniwko
awan pategna
Pangngaasim ta dimo ibasura
Adu nga arak insan ti inibusna
Ayatko laeng a lagipenka
Neber a Kailiwka
Apay
koma a kailiwka?
Ta sika, awanan ka met rikna
Uray la koman' surat nga inka pangkumusta
Ken toy insan mo a gumawgawawa.
Pusom,
bimmato kan' itan!
Ta dinak man la malagip a suratan
Ania aya ti innak nagkurangan?
Ta dinak man la pulos maparsiakan.
Rumbeng
kadi nga iliwek ti kas kenka?
Awanan puso, awanan rikna
Apay a dim' man la maawatan ti innak isarsarita
Itoy daniwko a napnuan numona.
Apay
koma nga iliwenka?
Ammok met a linipatmon panag-insanta
Apay a dim' man la iginggina
Dagiti iyar-ararawko kenka?
Nambaram
lukdit, Ay Don’t ker no iliwenka!
Apay, asinno ka la koma?
Ta la matam a dakkel ken agongmo a luppap ti mangpaguapo kenka
Ti kunam kailiwko't kasta a langa?
Neber a kailiwka.