Nel añu
2008 AsturCelta cumple 10 años de dedicación altruista al espardimientu
de la música folk y de raigón d'esi vieyu país nomáu Asturies, 10 años
nos que fuimos medrando al compás que diben marcando los músicos
asturianos, 10 años nos que fiximos munchos collacios y un puñadín
d'enemigos... Talantamos que ye esti l'intre de facer repás al trabayu
fechu y el d'entamar una nueva etapa nesta xera de nueso, una nueva
etapa na que siguir promocionando la música asturiana, naguando
por facelo meyor, ufriendo más información y de meyor calidá. Una xera
na qu'esperamos cuntar cola aidanza de tola xente involucrao nel folk
asturiano (músicos, discográfiques, promotores de conciertos y
aficionaos).
P'algamar esi envís d'ufrir una información de mayor
calidá facemos medrar el númberu de seiciones d'AsturCelta. Una d'eses
nueves seiciones va llevar el nome de Pioneros
na que queremos facer homenax a toes eses bandes que foron quedando
nel camín; otra de les novedaes va ser una axenda de Conciertos,
na que sedrá imprescindible la vuesa collaboración; y una seición
d'Humor
onde alcontraréis caricatures de músicos, comics basaos nel mundiu
folk astur y delles semeyes comprometíes. Naguamos tamién por poder
ufiertavos dalguna entrevista y facer reseñes de tolos discos que van
asoleyándose (ésta ye la xera más abegosa porque mercar tolo que sal
al mercáu...). El tiempu dirá si seremos quién a ello, que vos
preste!!
Gracies
por visitanos. Afayaivos.
